Date ni 25 November, 2021 (Thursday) tlai dar 3 khan Mizoram Assembly Auditorium, Treasury Square, Aizawl ah Mizoram Youth Commission programme 'Savunzial' (Lecture Series) “An evening with Mr. Jojo Mathew” tih hun hman a ni. He hunah hian Mizoram Youth Commission Chairman, Dr. Vanlaltanpuia, MLA chuan hun hmanpuiin, Mizo thalai kalkhawmte hnenah, “Mizo thalaite hian Thlanrawkpa khuangchawi hun laia kan savun lehkha tihbo kha zawng hmu leh a, a chhung a finna thu tam tak awmte kha hmuh kir leh ngei kan tum a, chumi tur atan chuan MYC hian hma a la mek a, a la zel dawn a ni"a ti a. "Mizo thalaite hian kan thiamna kan sawrchhuah a, taihmak leh thawrhimna nen a he kan theihna hi nei let leh turin i bei ang u “ tiin thalai kalkhawmte a sawm bawk a ni. MYC Chairman Dr. Vanlaltanpuia chuan a tul dan ang zelin, ziaktu lar, Politician lar leh mi hmingtha tak tak te pawh Mizo thalaite kawm phak leh titipui phak turin MYC chuan chhawpchhuah zel a tum thu a sawi bawk.Mizo thalai All India Service examna a hlawhtlinna chang kan tlem sawt tak em avang leh helam kan harh chhuah lehna tur te, Exam hmachhawnna a tana kawng inkawhhmuhna atan te hun hman a ni.
He programme ah hian Mr. Jojo Mathew, Director, ALS ( Satellite Education Pvt. Ltd) New Delhi chuan thusawina hun a nei a, Mizo thalaite tan a UPSC leh All India Service Exam tumte tana thil pawimawh tam tak a sawi a. Mizo thalaite hian hlawhtlinna an chang thei a, exam hi ralkhat en a, huphurh nghal mai lova, zangkhai tak leh phur taka inbuatsaihna mumal tak nen a Exam hmachhawn turin a fuih bawk a ni.
He hunah hian zawhna leh chhanna hun hman a ni a, Mizo thalai kalkhawmte atangin All India Service Exam chungchang a an hriat duh pawimawh tak tak te Mr. Jojo Methew hian a hrilhfiah a ni. Hun hlu leh hlawkthlak tak hman a ni a. Kalkhawm ten a hlawk thlak thu leh a zawngchhang thlak thu an sawi a ni.
He programme ah hian All India Service exam lam tui mi thalai 130 zet an kalkhawm a ni.
Pu Donny Lalrustsanga, MYC Secretary chuan lawmthu sawiin hun hnung a khar a ni
