Mizo Students Association Bangalore ten an buatsaih “ ZIRNA KUTPUI 2022” chu dt 11th , November, 2022 ( Friday) khan Tagore Hall, The United Theological College-ah  Bangalore a Mizo Zirlaite pualin hlim takin an hmang. He hunah hian khuallian atana sawm anih angin Dr. Vanlaltanpuia, Chairman, Mizoram Youth Commission leh Vice-Chairman Higher & Technical Education Board chuan a hmanpui a ni.

    He programme ah hian Khual zahawm Pu Lawmna Kima, BMA President leh Mananging Director, Ernst & Young Company niin Rev Lalrammuanpuia Pachuau, Bialtu Pastor-in hunserh hmangin Tv. Lalmuankima, President, Bangalore  Mizo Students Association in a kaihruai a, zirna a infuih tharna hun leh zirlaite chu ram pawn a nu leh pa leh chhung leh khat te hmuh phak loh a awm an nih angin nungchang leh khawsak dan phung in zirtir a, infuih tharna hun atan he programme hi an hmang a ni. 

He hunah vek hian khuallian Dr. Vanlaltanpuia chuan thusawiin “Tun dinhmunah Bangalore chu India ram khawpui zingah Mizo zirlaiten an bawh nasat ber hmun anih tawh avangin ram pawn a mizo zirlai chhuanawm ber be rte an nih thu leh Mizoram hma thlir leh mi fakna ber an nih tak thu a sawi a,  Chung zofate hmun hrang hrang atanga kalkhawm ten an chhawr tangkai tur a Mizo Students Association Bangalore ten “Zirna Kutpui” an buatsaih thei chu a chhuanawm tak zet a ni” ati. India ram a zirna kalphung hi zawi zawiin a inher danglam zel a, mahni line theuh a thiamna bik neilo tan chuan hna tha hmuh a har takzet tawh a, inthlahdah leh dawngdah taka zirna kalpuite tan chuan hmun a awm ta meuh lo a tih theih.  Chuvang chuan zirlaite chu tum nei leh thawhrim tak takna nen zirlaite chu bei turin a fuih a ni. A bik takin tun dinhmun a Mizo te kan hniam falna em em  All India Service leh Central Service exam UPSC in a buatsaih thinah nasal eh zual a Mizo ti hming tha tura zir turin a fuih nawn leh a ni.

Mizoram Youth Commission in Super IAS programme (Full Sponsorship) leh Mega Hybrid Coaching te, Local Level Grooming Programme a buatsaih thinte lo ngaihven fo turin a chah bawk a ni.

    Zirna ngawr ngawr piah lamah thatlai hun a rei loh avangin mahni theihna leh thiamna te nasa taka tipung ( Invest) turin a chah bawk a ni. He hunah hian khuallian chuan Bangalore Mizo Zirlai ten a tul apiang a an hman atan Rs 50,000/- a hlan a ni.

Mizoram Youth Commission enkawltu anih angin Bangalore thalaiten harsatna leh thil tul an neihte chu a hnen a thlen thin turin a chah bawk.

He programme a hman zawh hian India rama football in elna sang ber (ISL) a Bengaluru Football Club( BFC) leh East Bengal Football Club ( EBFC) ten Sree Kanteerava Studium, Bangalore a an khelh chu Mizo tlangvalte Jerry Lalrinzuala leh Lalchungnunga leh a dangte an tel avangin a hmunah a en nghal a ni.

    Mizo tlangvalte chu India ram Football inelna sang ber a khel mek club zing a an tel phak chu a chhuan thu leh Mizo nih an tih nawm thu a hrilh a, an kal zelna tur atan duhsakna a hlan bakah thangtharte tana sulsutu pawimawh tak ni zel turin a chah bawk a ni.

Dt 12th , November,2022 (Saturday) hian Bangalore Mizo Association hruaitute ngenna angin Mizoram House sakna tur atana ram sawrkarin a lei fel  tawh hmun hma tlawhna hun  a nei a. Bangalore-ah hian mimal inluah a Mizoram House hi kalpui mek a ni a, Mizo hnathawk leh zirlaite an pun nasat avanga House changtlung tak an mamawhna  a san thu BMA hotute hian a hnenah an lo thlen a ni. Dr. VAnlaltanpuia chuan heng an thu thlente chu Chief Minister zahawm tak Pu Zoramthanga, GAD changtu hnenah uluk taka alo thlen tur thu a hrilh a ni.