Dr Vanlaltanpuia MLA leh Chairman Mizoram Youth Commission chu, Nagaland a Task Force for Music & Arts (TaFMA)-in Nagaland Governor leh Chief Minister te puala Musical Event a buatsaih, November ni 17.2021 hmang tura an rawn sawm ang in Kohima ah a kal a. Nagaland Sawrkar chuan State Guest ah lo puangin, khualtha thlenin a lo thleng a ni. Event buatsaih ah hian Chairman MYC chuan thusawiin, Nagaland Sawrkar in Thalaite chawikanna tura kawng hrang hranga hma an lakna te fakin, a bik takin Music lama TaFMA in hma a lakna te chu fakawm a tih thu a sawi a. Mizo Thalaite tana Nagaland TaFMA in kawng a sialpuina kawngah te lawmthu a sawiin nasa zawka thawhho tul a tih thu te a sawi a ni. Nagaland Chief Minister chuan Chairman Mizoram Youth Commission hi lawm taka lo dawng sawngin TaFMA hruaitute nen pawh MYC nena an thawkho thei lawmawm an tih thu leh MYC tana an in hawn zia te an lo hrilh bawk a ni.

TaFMA hi Nagaland a thalaite kawng tinrenga huikhawmtu niin, india ram leh khawvel a lar chho mek Hornbill Festival  buatsaihtu a ni a. TaFMA Working Chairman nilai leh Adviser to Nagaland Chief Minister ni bawk, Abu Metha leh TaFMA Adviser Theja Meru te hi MYC in a buatsaih Perhkhuang 2021 Grand Finale thla kalta a Aizawl-a neih hmanpui khan an lo kal a. Kha mi tum a MYC Chairman ho a an lo sawiho tawh umzui nan Hornbill Festival 2021, December ni 1-10, 2021 chhunga a neih tur ah pawh Perkhuang Winner 5 te leh Mizo thalaite tan minute 40 hun an pek tur thu te an lo hrilh a. Kum thar lamah pawh TaFMA-in India ram pawna Platform an neih thenkhat pawh MYC te a ken tur thu an lo hrilh bawk a ni.

Dr Vanlaltanpuia hi MYC Under Secy, Pu H Lalnunzuala leh MYC partner NEW-a an Project Director, Pu HS Lalruatliana (Booma) leh MYC thawktu ten an zui a, Nagaland Sawrkar in Thalaite hamthatna tur leh hmasawnna tur a hma an lak dan te an zirchiang nghal bawk. Heng bakah hian Kumthar lama Spotify, AR Rahman Conservatory Music leh Rolling Stone Magazine te nena TaFMA kaltlanga Professional Skill Development Training on Music neih dan tur kimchang te an rel ho bawk a ni.

Tun tuma MYC Chairman zin hian Indopui II-na tawp lama Japan ral lian, British leh a tanrualpui Sawrkar ten lo dang chat a, inbeihna nasa tak thlenna hmun, Kohima War Cemmetry chu tlawhin, Japan rallian lo do let a ram mipuite nunna chhan tura nunna hlu tak hlan tu sipaite zahna chibai a buk a, he hmuna Mizo tlangval Robuaia Lushai kum 23 mi a vanglai hun hlu tak a ram tana nunna hlantu thlan pawh tlawhin zahna chibai a buk bawk a ni.

MYC Chairman hian Hornbill Festival 2021 an nghahna hmun te a tlawh bakah, zin mite hip thei tura Nagaland Sawrkarin Naga Culture leh Tourism a kaihkawp dan te leh hemi atana Thingtlang khua an buatsaih dan leh an hmalakna te a hmunah a en bawk a ni