Dr. VANLALTANPUIA'N SERCHHIPAH YOUTH CENTRE SAKNA LUNGPHUM PHUM
No.6711/2020-2021 
Dated Serchhip, the 30th November, 2020:  Vawiin hian Dr. Vanlaltanpuia, MLA, honourable Chairman Mizoram Youth Commission (MYC) chuan Serchhip Darnamtlanga MYC Youth Centre sakna tur lungphum a phum.
Youth Centre lungphum inkhawm hun tawite Darnam YMA Library Hall a neihah Dr. Vanlaltanpuia chuan Serchhip in Youth Centre an nei tur chu a lawmpui thusawiin, tha tak leh tluang taka sak zawh anih theih nana thawhpuiah Serchhip mipuite a sawm a. MYC hi mizo thalaite tana ruahmanna an siam thenkhatte a tarlangin; Mizo thalaiten Central Service an tlin theih nan MYC kaltlanga sawrkarin thalai 20, a thlawn veka state pawna coaching kal tir an tum thu a sawi a, a kal turte zawnna hi December thla vela buatsaih theih an beisei thu a sawi. Tin, state pawna coaching kal tura thlan chhuah mi 20 an tirh bakah state chhungah Off line coaching centre hmun liah din an tum thu a sawi bawk a, chutiang centre din turin Mizoram chu zone pali then a ni, a ti. Tin, Covid19 vanga state danga hnathawk lo hawte umzuina hmalakna pawh chak taka bawhzui zel anih thu a tarlang bawk. Sipai lama kan thalaite an luh tam zel theih nan training an buatsaih thin thu leh Vairengtea inbun sipai training na hmun tha CIJW ah te training neih pui thin an nih thute a tarlang a ni. Dr. Vanlaltanpuia hian mizote chu Pathianin theihna ropui tak neiin min siam nia a hmuh thu a sawi a, football ah te, music ah te, fashion designing ah te leh kawng dang dangah kan thalaite an duai lo hle a. Heng theihna kan neihte tuaihriama tihpun zel hi MYC thiltum ber a ni Serchhipa Youth Centre pawhin a tum pawimawh tak chu Serchhip thalaite theihna tihpuna, tuaihriam a ni, tiin a sawi.Dr Vanlaltanpuia, Chairman, MYC
He hunah hian Pu Donny Lalruatsanga, MCS, Secretary, MYC chuan report tlangpui a pe a. He Youth Centre hi NEDP_SEDP atanga sak niin Brilliant Consultancy in an thawk mek tawh a, kum thum chhunga zawh tura ruahman a ni. Hnathawktuten tha taka hna an thawh theih nan a veng neitute leh Serchhip mipuite thawhpuina kan mamawh hle a ni, a ti. Project Cost hi Rs. 3 crore niin chhawng thuma sanga sak tur a ni a. A dung feet 100 a vang feet 45 a ni anga, parking te, chowkidar quarters te, mikhual 20 thlen theihna te, committee room leh indoor volleyball court te a awm tura duan a ni. Pu Donny Lalruatsanga hian MYC hnathawh dan leh hmalak chhoh mek tlangpui a tarlang bawk.
Pu Lalmuansanga Ralte, MCS, Addl. DC Serchhip chuan he hun hmang tura lokalte lawmna thu a sawi a. Serchhip thalaite tana chhenfakawm tak tur Youth Centre Mizoram Youth Commission in an ngaihtuah sak avangin lawmthu a sawi bawk a ni.
Dr. Vanlaltanpuia, MLA hi MYC Secretary Pu Donny Lalruatsanga, MCS bakah Pu H. Lalnunzuala, MPE&SS, Under Secretary, MYC leh official dangten an rawn tawiawm a ni.
Pu H. Lalnunzuala, MPE&SS, Under Secretary, MYC in lawmthusawina neiin Youth Centre lungphum inkhawm hi a khar a ni.