Asian Football Confederations (AFC) hnuaia Football coach ni thei tura inzirna C-Diploma Coaching Course thawh hnihna chu nimin Thawhlehni khan Regional Sports Center, Saidan, Kolasib ah khar a ni ta.
A khar ni ah hian Course a tel Mizo football coach 19 ten ni 5 chhung khelmual leh classroom a practical leh theory an tih hnuah Exam an bei a. All India Football Federation (AIFF) atanga lokal, Instructor Mariano Diaz-a kaihhruaina hnuaiah thawh khatna leh thawh hnihna (module one and two) chu zawh fel niin, Mizo football coach, D-License an pass hnua C-License neih tum mekte hian result an nghak ta a ni.
C-diploma coaching course kharnaah hian Mizoram Football Association (MFA) thawhpui, Mizoram Youth Commission (MYC) Under Secretary Pu H. Lalnunzuala chu khuallian niin, coaching course hlawhtlinnana MYC in sum beitham tak an thawh hmanga MFA ten felfai taka coaching zirna an huaihawt chu lawmawm a tih thu leh MYC chairman pawhin hun lo awm tura thawhho zel a duh thu te a sawi a. Aizawl chauh ni lo, District hrang hrang atanga Football coach ten thiamna nei tura course an luhchilh chu lawmawm a tih thu leh a rah chhuah, Mizo naupang leh thalai footballer tha tak tak an chhuah phah ngei a beisei tlat thu Pu H. Lalnunzuala chuan a sawi.
Kharna inkhawm hi MFA Finance Secretary Pu Lalruatsanga Tochhawng chuan kaihhruaiin, Mizoram sorkar in MYC kaltlanga infiammite duhsak a C-diploma course an rawn sponsor chu lawmawm a tihzia a sawi a. MFA huaihawt inelna dangah pawh an tlanchhe ngai lo chu ropui a tihzia a sawi bawk.
Course Instructor Mariano Diaz chuan infiammite hmasawnna atana State Football Association leh sorkar an thawk dun chu ropui a tihzia leh state dangte tan pawh entawntlak a tih thu a sawi a; "ISL a khel phak Mizo thalai thahnem tak an awm hian Mizoram chu football player leh coach tha tak tak chher chhuahna hmun a ni tih a lantir chiang hle a ni," a ti.
Course a tel, football coach thahnem takin MFA leh MYC bakah, Kolasib District FA ten duat taka an enkawl chu lawmawm an tihzia an sawi a. Instructor in zirtirna a pek atanga hlawkna nasa tak an chhar thar thu te, an awmna apiangah football hmasawnnana thawh zui zel an tum thute an sawi chhuak bawk.
AFC C-Diploma Coaching Course hi nikum December thla khan Saidan a Sports Centre ah hian a thawh khatna huaihawt a lo ni tawh a. Mizo football coach 24 te training pek an ni a, tun tum - a thawh hnihnaah hian mi 19 an tel thei a, state pawn atangin coach pathum an rawn tel thar thung a ni.
