Mizoram leh thenawm state-in ramria buaina a neih laia ram leh hnam tana tha thawhtu mi huasente hnenah Mizoram Youth Commission (MYC) chuan chawimawina a hlan.
Pu Lalruatkima, Minister I&PR
MYC chuan Mizo thalaiten rilru puthmang dik an neih theih nan hma a la a, zirtawpni zanah HYVE Aizawl City Hall, Zodin square-ah Information Minister Lalruatkima'n peng pakhat, 'Huaisen Inzirtirna' Khuangchera Project a hawng.
Vairengte Joint Village Council Chairman, Laltinkaia (Vairengte), Phainuam MHIP, Phainuam VCP, Thinghlun VCP leh Saihapui VCP hnenah ramri venga an thiltih avangin tawlhloh puan, thuziak leh Rs 10,000 theuh hlan a ni.
Dr Vanlaltanpuia
Chairman MYC leh Lawmman dawngtute
Ruatkima chuan thalaite tan MYC hmathlir leh hma laknain awmzia a neih ngei a beisei a, chawimawina dawngtute chu phu a ti hle.
"Mizote ngaihven, kan mittui titlatu, hnam inpumkhatna kawnga tanrualna min petu, ramria harsatna kan tawka kan hnam pasaltha, ramri khaw hrang hranga awm te, mi tlawmngai leh huaisen te, MYC-in chawimawina no pui a dawmtir hi an phu hle a ni," a ti.
'Covid-19 leng do letna kawngah ramria cheng mi tlawmngai tam takin dai theua hma an lakna' ropui a tihzia a sawi bawk.
Donny Lalruatsanga, Secretary, MYC with Malsawmkima Vairengte
MYC Chairman Dr Vanlaltanpuia chuan 'Huaisen Inzirtirna' Khuangchera Project bakah, pasaltha - Taitesena, Khuangchera, Vanapa, Chawngbawla leh a dangte hmingchawiin khawtlang rilru puthmang a tha zawnga kaihruai turin hma lak zel an tum tih a sawi.
Serlui bialtu MLA Lalrinsanga Ralte bakah, Central YMA, MZP leh MSU President-ten infuihna thu an sawi bawk.
