Aizawl 13th December 2022: Nimin khan Mizoram Youth Commission hnuaia ‘Youth Centre’ chu Mizoram New Capital Complex (MINECO), Khatla-ah Labour, Employment, Skill Development & Entrepreneurship Minister Pu Lalchhandama Ralte-in a hawng.

Khuallian Pu Lalchhandama Ralte chuan hun reilote chhungin 'Thalaite Inpui' (Youth centre) sakzawh anih chu lawmawm tiin thalaite tan thiamna tak tak an chharna hmun nih ngei a beisei thu a sawi a. Mizoram Youth Commission (MYC) chu 2008-a din chauh nimahsela thalaite tana an hmalakna chu fakawm a ti hle a, India ram state dangte zingah Youth Commission mumal taka din leh kalpui an tam loh laiin Mizoram chuan tha takin a kalpui thei zel a ni a ti. MYC chuan hmathlir fel tak neiin thalaite tan khawvel nuam zawk siamin hma a la mek zel a, zirna (academic) chauh ni lovin sumdawnna, infiamna leh eizawnna tlak tling nei thei turin training a kalpui thin a, a rahchhuah tha pawh hmuh mek zel a ni a ti.

LESDE Minister chuan ram leh hnam hmasawnna leh intodelhna turin thalaite an pawimawh takzet a, an hnena thiamna leh ngaihtuahna thar pek hi MYC tum ber a ni a ti. MYC kaltlanga Mizoram sawrkar hmalakna hrang hrangte tihhlawhtling turin thalaite chuan MYC chu thiam leh tangkai taka hmang turin a chah nghal a ni. Pu Lalchhandama Ralte chuan National Skill Mission-hnuaiah Mizoram sawrkar pawhin Labour, Employment, Skill Development & Entrepreneurship (LESDE) Department kaltlangin nasa taka hma a lak thu sawiin Minister chuan 27-28 August, 2022-a ‘World Education Summit’ Hyderabad-a neihah khan Mizoram chu Skill Development lama thangduang ber leh theihna nei ber state ah an puang hial a ni a ti. National Skill Competition, 2021 ah mi 12 lai thawn ve niin medal pahnih Mizoram chuan a dawng a, World Skill Competition-ah tel tura sawm hial an nih thu a sawi bawk. Mizote chu hnam ropui tak, theihna sang tak nei an nih thu sawiin, khawvel hriata Mizo hnam chawisang leh chawimawi turin Mizo thalaite chu ‘Youth Centre’ hi hmang tangkai turin a sawm a ni.

Mizoram Youth Commission (MYC) Chairman Dr. Vanlaltanpuia pawhin thu sawiin, Youth Centre hawn tak chuan Mizoram sawrkarin thalaite a ngaihtuah dizia a tilang chiang hle a ni a ti a. Youth Centre hi Aizawl bakah hian Lunglei leh Serchhip ah te hawng leh tura ruahman mek a ni a ti. MYC kaltlangin Coaching Centre hi Mizoram District panga - Aizawl, Lunglei, Champhai, Kolasib leh Siaha ah te hawn tawh anih thu leh UPSC (Union Public Service Commission) leh SSC (Staff Selection Commission) Exam hmachhawn tum ten tangkai taka an hmang mek thu a tarlang bawk.

Vice Chairman, Agriculture Development Board Pu H. Biakzaua leh Vice Chairman, Commerce & Indusatrial Development Board Pu K. Laldawngliana te pawhin thusawiin Youth Centre chu thalaite theihna leh thiamna haihchhuahna hmun a nih an beisei a, thalaite chu Mizoram inghahna an nih angin theih tawpa tan la turin Mizo thalaite an sawm nghal a ni.

Vawiina Youth Centre hawn tak hi chhawng 5 niin Gym Room, Badminton Hall, Store Room, Chowkidar Room, Coaching classroom leh mikhual room te awmin cheng vbc. 5 senga sak a ni. Hawnna inkhawm hi NGO leh Kohhran thalaiten an telpui a, Superintendent, Mizoram Youth Commission Pi Doris Zothanchhungi chuan lawmthu sawiin hun a khar a ni.