Vawiin dt 30th November, 2022 ( Wednesday) chawhma dar 12:00 khan Mizoram Youth Commission Chairman Dr.Vanlaltanpuia leh Kochi (Kerela)Biennale Exhibition a Mizoram aiawh a tel tur Student’s Biennale participants te nen Mizoram Youth Commission Conference Hall, MINECO, Khatlaah inkawm hona an nei.

        

        He Biennale-ah hian kum 2 danah Art Exhibition neih thin a ni a. India ram state hrang hrang atangin aiawh thlan chhuahte an tel thin a. He hun hi India ram mai ni lo, khawvel hmun hrang hrang atangin chhimtu an tam thei hle a. Ngaih hlut a hlawh thin hle a ni. He hunah hian Mizoram aiawh hian mi pathum (3) thlan chhuah an ni a, heng mite hian Interactive Art Installation, Nghahloh Dawr behchhanin Nghahloh dawr chungchang leh Mizo rinawmna an pholang dawn a ni. Kan hriat angin Mizoram kawngpui khawkar kawng a hnam dang khualzin ten hmuhnawm an tih leh ropui, mak an tih em em thin,The Hindu leh Times of India chanchinbu pawhin an lo chhuah hial tawh “Nghahloh Dawr” nihna leh kalphungte, hemi phen a Mizo hnam rinawmna inphumte chu he hunah hian an pholang dawn a ni. He exhibition chhimtu hi India ram chhung mai nilo khawvel pumpui atangin chhimtu an thahnem thei hle a, chawlhkar khat chhung a mi nuai chuangin an chhim thin a ni. He exhibition hi thla li (4) chhung awh tur a ni ang.

 

        He Biennale a tel turte hi Gov’t Johnson College atangin mi pathum - F.Lalremkima, Elizabeth Lalruatdiki leh Lalrinchhani te thlanchhuah an ni a. Hengte mite hian he Exibition-ah hian Mizoram ai an awh dawn a ni. 

 

        Mizoram Youth Commission Chairman Dr. Vanlaltanpuia chuan, Mizote kan hniam bik loh zia leh entawn tlak kan nih zia a taka lantir turin leh Mizo tih hming an hriat ruala “MIZO RINAWMNA” an rilruah a lan theihna turin he exihibition hmang a theihtawp chhuah turin a duhthu a sawi a, duhsakna a hlan bawk a ni.