Date 9.6.2018 : Pu _, MLA & Chairman, Mizoram Youth Commission hovin MYC Office, Aizawlah ni 8.6.2018 khân Mizoram chhunga Kohhran ṭhalai pawl hrang hrang hruaituten kut insuihin Zoram ṭhalaite tana Pathian hnena ṭawngṭai hona hun an hmang.
He ṭawngṭai hona hunah hian Kohhran hrang hrang ṭhalai pawl pakua (9) - Central KṬP (PCI), MṬKP (BCM), Territorial Salvation Army Youth, Diocese Catholic Ṭhalai, General PYD (NE), General PYD (MZ), Adventist Youth Ministry, LIKBK ṬKP leh KrizyhpaThyutlia Py (ECM) te an tel. Kohhran ṭhalai hruaitu kal khâwmte chuan Kohhran indaidanna bang ṭhiat veka MYC hmalakna chu fakawm tiin, Zoram ṭhalaite tana thawh hona tur forum siam a ni ta chu Pathian remruat a ni ngeia an hriat thu an sawi.
MYC Chairman office luah ṭan ni 25 January, 2018-a an lo sawi ho tawh angin Kohhran ṭhalai pawlte nen hian India ram hmun hrang hranga ṭhalaite tana hmun pawimawh tlawha zin ho dan tur Chairman Chamber-ah rel zui nghal a ni a. MYC Exposure Tour 2018-a zin chhuak tur hian Central KṬP leh MṬKP aṭangin aiawh pathum ve ve an inthlang chhuak ang a, Territorial Salvation Army Youth, General PYD (NE), General PYD (MZ), Diocese Catholic Ṭhalai, Adventist Youth Ministry, LIKBK ṬKP, KTP (ECM) aiawh pahnih ṭheuh inthlangin, kal tur inruat fel hunah meeting neih leh tum a ni a, ruahman dan chuan August 2018 thla chawhma lamah he tour hi kalpui tum a ni.
He meeting-ah hian Pu _ chuan tunlai khawvel thiamna chhuak thar zelin Mizo ṭhalaite a run mek lai hian ṭhalaiten nun innghahna bulfuk, tum mumal tak neia khawvel ke pen ruala an pen ve theihna tura thawh hopuiah Kohhran ṭhalaite chu a sawm a. Ṭhalaiten nun kawng dik an zawh theihna turin School Education Department leh Higher & Technical Education Department te hnenah ngenna siam ni se an ti a. An enkawl lai school/college zawng zawngah kumin chhung hian ni khat tal Moral Education pekna hun atana hman ni se an ti a. He hunah hian Pastor-te leh khawtlanga mi zah kai chin, naupangte zirtir tak tak thei tur te sawm ni se an ti bawk.
MYC Chairman chuan Kohhran ṭhalaite chuan mahni pual inkhawmah vawi khat tal Zoram ṭhalai chhan chhuah ngai mekte leh ṭhalaite hmahruaitu tur zawng zawng tana ṭawngṭai rualna hun hmang turin a sawm a, he a sawmna hi tihhlawhtlin ngei an tum thu Kohhran ṭhalai hruaitu kal khawmte chuan an sawi a, Zoram ṭhalaite tan ke pen hova hma lak ho zel ni se an ti.
