Mizoram Youth Commission-in Delhi-a IAS coaching-a kal tur thalai 20 a thlang chhuak a, heng mite hi an zirna senso zawng zawng MYC-in a tum sak vek dawn.
MYC hian Nilaini khan IAS Coaching-a kal tur thlanna hi a buatsaih a. Hetah hian mi 42-in Exam an paltlang a, heng mite hi nimin leh vawiin khan Personal Interview neihpui niin, a titha zual 20 hi thlan an ni a. Thlan chhuahte hming vawiin khan MYC Chairman, Dr. Vanlaltanpuia'n a puang a, ST category-ah mi 19 leh General Category-ah pakhat thlan an ni. MYC Chairman chuan, IAS coaching kal tur thlan turah hian Delhi-a ALS in zawhna an siam tih a sawi a, zawhna hi email hmangin an rawn thawn a, chu chu magistrate hriatpuia hawn niin, Govt Press ah chhut leh a ni tih a sawi. Dr. Vanlaltanpuia chuan, Interview dawnah written exam a an mark hmuh hriattir an ni lo tih sawiin, interview zawh hnuah a pahniha an mark hmuh belh khawm a ni tih a sawi.
IAS coaching kal tura thlante hi ST Category-ah Albert Malsawmtluanga Mission Veng, Lalzara Mission Veng, Elijah LH Sanga Armed Veng South, Lalhriatpuii Phutin Serkawn II Lunglei, Dennis Chozah Dawrpui Vengthar, Vanlalawmpuia Renthlei Luangmual, Jonathan Malsawmtluanga Thenzawl, Terressa Vanlalmalsawmi Mission Veng, Lalchhuanawma Ralte Durtlang Mualveng, Zoremmuana Ralte Khatla Bethel, Lalramhluni Chawngthu Saikhamakawn, PC Lalpekhlua Venglai, Kolasib, Lalnunchhani Hnamte Sateek, PC Lalchhanchhuaha Tlangnuam West, Francis Lalrinzuala Ramhlun North, Lalthankima Tanhril, Lalthlamuana Sailo Church Street Electric Veng, J Lalchhandami Electric Veng, leh Malsawmkima College Veng an ni a. General Category-a thlan chu Ricky Sapkota Durtlang, Leitan a ni.
Heng mite bakah hian panel list ah mi 5 dah an ni a. Covid 19 hri leng reh hunah, New Delhi-a coaching kalna tur ten course an hawn hun hunah an kal dawn a ni.
