Mizo Press Releases
COVID-19 hrileng vanga mizo hna chan ten eizawnna an neih theihna tur chungchang hmalaknaah MYC leh Bank officials ten meeting nei
No.2827/2020-2020
COVID-19 hripui leng avanga mizo hna chan lo haw ten lei rem an lo rah leh theih nan Mizoram Youth Commission leh Bank Officials ten Planning & Programme Implementation Department Conference Hall-ah vawiin khan meeting an nei a, meeting hi Deputy Chief Minister Pu Tawiluia’n a kaihruai a ni.
Deputy Chief Minister Pu Tawnluia chuan thu sawiin COVID-19 hripui leng avangin India ram khawpui hrang hranga Mizo thalai hna chan, lo haw tam tak an awm a, lo haw tur pawh an awm mek lai hian Mizoram sawrkar chuan Mizoram Youth Commission (MYC) kaltlangin Mizoram chhunga financial institution te nena tangkawpa eizawnna an neih theihnan enge tih theih awmte, hmalak theihna a awm em tih te ngaihtuah tlang turin kalkhawm te a sawm a. MYC Chairman Dr. Vanlaltanpuia hmalakna in MYC chuan thalai lo haw hna chan te, a duh leh a ti mi te tan soft skill training pek an nih theihnan soft skill training pe thintu Department hrang hrang hotute nen ni 29.6.2020 khan meeting a lo nei tawh pui tawh a, he meeting eng-ah vawiin hun hi a lo thleng a ni, tiin a sawi a.
Deputy Chief Minister Pu Tawnluia chuan soft skill training hi sawrkar in lo pe ta pawh ni se, bul tan tha leh tur chuan a tam zawkin sum leh paiah harsatna an neih theih avangin, Mizoram chhunga financial institution/bank hrang hrang a hotu lian ber be te kokhawma, ruahmanna awm thei te, engtiangin nge lei rem rap leh turin, hna chante rahbi tleu tawhte chu hma kan lakpui ang a, scheme neihsa bakah hian sawrkar nen tangdunin kawng dap dan a awm thei em tih te chu ngun taka ngaihtuahna seng turin a ngen a. Pu Tawnluia chuan financial institution/bank hotute pawhin meeting zawha sawrkar hnena provisions an thehluh te chu enho a ngaih leh tur thu sawiin, vawiin meeting chu a bul tanna a ni, tiin a sawi.
MYC Chairman leh Lunglei North Bialtu MLA nibawk Dr. Vanlaltanpuia pawhin thu sawiin, state pawna fehchhuak MYC-a in report te hnen atanga an thu dawn danin, thlatina an sum lakluh thin Rs.3.45 cr. lai a tling a, hei hian Mizoram economy chu nasa takin a nghawng ang tih rin theih a ni a, a rang lama hmalak hi MYC chuan a tul a ti tak zet a ni, tiin a sawi a. Thalai hna chan, raw haw te zingah mi tlemte chauh COVID-19 hripui leng a reh hnu pawh a hnazawm leh thei tur an ni a, zaa 90 aia tam hi chuan an hna hi an chan hlen dawn a ni, tiin a sawi.
Meeting-ah hian UCO Bank representative hnen atangin MUDRA loan, Rs 10 lakhs thleng an pek theih thu te, COVID-19 hripui leng avanga harsatna tawk Mizo thalai hna chante chu ngaihsak an lo nih bik tur thu te ngaihthlak a ni a. Mizoram Rural Bank representative chuan post covid-19 plan MRB in a siam thu te sawiin, IBPS kal tlanga MRB-a assistant post ruak te pawh online application thalai hna chan graduate si ten ngaihven se a tih thu a sawi a. Mizoram Co-operative Apex Bank pawhin thalai hna chan lo haw te an tui zawng hriat nan inhmuhkhawmna siam nise, chu mi mila hmalakna siam nise, tih thu an sawi a. Axis Bank leh HDFC representatives te chuan branch thar an hawn turah graduate chin thawk tur an mamawh thu te leh, graduate lo tan pawh thawhtur a awm thu te an sawi a. Bank hrang hrangten provisions an neih te sawrkar hnena thehlut tura pawm tlan a ni.
Written by: Dr. Saithantluangi Zote, MIS, IPRO Dated: 7th Jul 20 5:06 PM
