Mizoram Youth Commission Chairman, Pu _ chuan Mizo thalaiten khawvel hmun dangah hna an thawh theih dan tur ngaihtuahin Delhi-ah a cham mek a. Mizo thalai thiam tak tak te’n ram pawnah hna thawh tur him si an hmuh theih nan Delhi-ah hian Ministry of External Affairs (MEA) mi pawimawhte a hmu a, Mizoram thalai thiamna hrang hrang nei tam tak an awm thu leh, chung thalaite chu zirna sang zawk leh hnathawh tur zawnga India ram pawna an fehchhuah mek thu te, sawrkar laipui hriatpuia hnathawh tur tha leh him zawk an hmuh theih dan ngaihtuahpui turin MEA Official-te a ngen a ni. 

Pu _ hian MEA mi pawimawh tak tak MC. Luther IFS, Protector General of Emigrants & Joint Secretary, Amit Lungun, IFS, Jt. Secretary (Consular, Passport & Visa Division), Vanlalhuma, Jt. Secy (GEM) te hmuin, Mizo thalaite ram pawna hna thawk duh tan awlsam zawk leh him zawka sawrkar hriatpui license neite kal tlang a, kawng zawn dan turte an lo sawipui a ni. Tunah hian The Emigration Act, 1983 hnuaiah Emigrate Project kalpui niin, State sawrkar leh Private Company tan pawh MEA hnuaiah in-register theih a ni a, license 1650 lai an pek chhuah tawh thu te, kumin kum tir atangin graded project thar Rs. 8 lakhs MEA-ah submit-in mi 100 tirh chhuah phalna license an pek theih thu te, chumi hnuaiah chuan license 109 lai vawiin thlenga an pek tawh thute anlo hrilh a. Heng registration license hnuaia kalte chu ram danga an thawhna leh India Sawrkar leh a aiawh Embassy-te nen an inhriatpui vek avangin an him bik hle tih an lo hrilh bawk. 

MEA kal tlangin Agency approved te nen an indawr thin a, hna zawn nana pawisa pek lawk vak a awm ngai loh thu leh a tul ang zawng zawng chu MEA-in a hriatpui zel thu te sawiin, Mizoram Youth Commission Chairman sawmna angin remchang hmasaah ram pawna hna thawk duh thalaite hnena awareness pe tur pawhin Mizorama lo kal an tum thu an lo hrilh a. Agency dik lo laka mipuite an him theih nan hna thawh tur zawn kawngah fimkhur a ngai tih an hrilh bawk a ni