Vawiin ni 14^th December,2022 ( Nilaini) chhun khan Dr. Vanlaltanpuia, MLA Chairman, Mizoram Youth Commission chuan a office-ah tun a UPSC Exam result chhuak a Mains Exam paltlang pahnih KC Zalena leh Betty Lalrinfeli  te chu a Office, Mizoram Youth Commission Office ah kawmna hun neiin thingpui a inpui a. Lawmpuina leh duhsakna a hlan a, Mizoram mipui leh sawrkar aiawhin lawmthu a sawi bawk.

          He hunah hian Dr Vanlaltanpuia, MLA, Chairman, Mizoram Youth Commission chuan, “ Tunlai khawvelah Mizo thalai tam zawkte chu Entertainment in a luh chilh a, hruai bovin an awm mek a. Incheina leh hlimhlawp chauh kan buaipui tawh lai a, UPSC Exam a tling thei Mizo thalai KC Zalena S/o KC Lalduhsanga Chhaolo ( Chhuarlung) leh Betty Lalrinfeli D/o Rev B. Lalramhluna te kan han nei nawlh mai hi a lawmawm takzet a ni” ati. Chairman chuan, Mizo Civil Service  leh Central Service ah Service lai kan nei tlem tawh hle a, a manganthlak tak zet thu a sawi  bawk. All India Service leh Central Service ah hian tunah belhkhawmin Mizo 41 vel chauh kan neih tawh lai hian Kc-a leh Betty te’n Exam Prelims leh Mains kaltlang a, Interview chauh hmachhawn tur an nei ta chu MYC chuan a ngaihlu hle tih a sawi a, chawimawina Nopui kan hlan che u a, Zahna chibai kan buk che u a ni; ati a, an ni aia chawimawi phu hi Mizo thalai zingah an awm  chuang lo tih a sawi bawk.

          KC Zalena leh Betty Lalrinfeli te hian Interview an la hmachhawn dawn a, interview an neih hun tur chiang fak erawh hriat theih ala ni lo thung a ni. He Interview an hmachhawn  turah hian an ni pahnih hi MCS Officer an nih avangin inbuatsaihna hun thawl zawk an neih theih nan Mizoram Sawrkarah an duty Service relaxation an neih theih nan MYC chuan a dilsak dawn a, Krismas laia an duty pawh tha taka interview tur a an inbuatsaih theih nan chhawk zangkhai sak an nih theihna turin Chief Minister hnenah MYC Chairman chuan a thlen sak tur thu a sawi bawk.

 Mock Interview hi MYC chuan a thlawnin a laksak dawn a, an pahnih duhthlan angin Vision IAS ah Mock Interview hi laksak an ni anga, senso zawng zawng MYC in a tum dawn a, an hriselna thu hlaah pawh Doctor rawn ngai an nih chuan an mamawh leh tul angang te MYC hian a tumsak dawn bawk a ni.

KC Zalena hi KC Lalduhsanga fapa niin Chhaolo ( Chhuarlung ) khua a piang a ni a, kum 2017 atang khan Civil Service hi a exam tan a, kum 2021 thleng khan Prelims ah chuan a tling ziah a, Mains Examah a vanduai thin a, Kumin 2022 hian a thawhrimna chuan hlawhtlinna a hruai lut a, Mains Exam a tling leh ta a, Interview chauh hmabak a nei tawh a ni. Kc Zalena chuan, “ Lehkhathiam thei ka ni ngai lova, lehkha erawh ka zirna nasa hle, Civil Service ka exam hmasak ber kum 2017 kha chu Chanchinbu chhiar nan ka hmang ral a ni ber” ati. Tunah hian Aizawlah SDC in a awm mek a ni.

Betty Lalrinfeli hi Rev B. Lalramhluna fanu niin   tunah hian SDC in Hnahthial ah a awm mek a. Betty hian 2017 khan a vawikhatna atan Prelims a exam  a tling nghal a, Mains Exam-ah a vanduai a, 2018 khan a exam leh a , a tling lo leh a beidawng mai lovin  kum 2019,2020,2021 kumah te khan mains ah a tling lo vek a, a hlawhchhamna indelh beh tir duh lovin kum 2022 khan exam leh in Mains Exam a tling ta a ni. Ani pawh hin interview hmabak a ni bawk.