Date 23.5.2018 : Mizoram Youth Commission (MYC) buatsaih Youth Summit & Road Show 2018 chu District capital hrang hranga hman a nih hnuah a tâwpna ber tûrin vawiin khân Lungleiah Chief Minister Pu _ chuan a hawng. Chief Minister hian MYC Incentive Cash Award Scheme, University exam-a Gold Medalist-te leh UPSC leh sawrkâr laipui hnuaia competitive exam hrang hranga inziak tlingte hnêna pêk chu a sem nghâl a; MYC Chairman Pu _ chuan Lunglei District chhûnga kumin HSLC leh HSSLC topper pathum hnênah lawmpuina a hlân bawk. Lunglei Youth Summit & Road Show 2018 hian ni hnih chhûng a awh ang.
Chief Minister chuan Mizoram hmun hrang hranga ṭhalaiten MYC hmalâkna an hmêl hriat a, Skill Development lama ṭhalaite hmasâwnna tûr thil ṭûl chi hrang hrang inhrilh hriatna hun remchâng leh, lehkha zirna leh eizawnna tûr thlenga kawng inkawhhmuhna hun buatsaih a ni chu lâwmawm a tih thu sawiin, "Youth Summit hi a hlawhtlinna chu tlawhtu tam lamah chauh ni lovin, a chhimtuten an kal zêlnaah, an zirna leh eizawnna atân an hman ṭangkai zêl dânah a innghat dâwn a ni," a ti. Chief Minister chuan Mizoramin hmasâwnna kawng a zawhnaah innghahna ṭha leh hnianghnâr tak a neih chu 'human resource' a ni tiin, Mizoramah hna thawk rual awm zîngah a tam zâwk chu ṭhalai an nih leh zêl avângin ṭhalaiten hma an sâwn theih nân ṭhalaite khawvêl siamhmang chu sawrkâr pawhin a ngaih pawimawh thu a sawi a. Games and sports lamah chuan infrastructure ṭha tak tak lo siam tawh niin hmang ṭangkaitu pawh an tamin, infiam mi chhuanawm leh thleng sâng tak tak Mizoramin a neih thu a sawi a. Zirna lamah pawh khawvêl el phâk quality education siam tumin kawng hrang hrangah hmâ lâk tawh a niin, hma lâk mêk zêl a nih thu te a sawi bawk a. Chutiang bawk chuan skill development lamah MYC kal tlangin chak taka hma lâk a ni a ti.
Chief Minister chuan Mizoram chu India leh Asia chhim thlang ramte inkâra insumdâwn tawnna atâna luhkâ pawimawh tak a nih thu târ langin, Mizoram economy tân hmasâwnna thlen theitu ṭha tak a nih thu a sawi a. Chu'ng chuan a ken tel tûr chu State pâwn leh ram pâwn thlenga awlsam zâwka ṭhalaite tân inzâr pharhna tûr a nih avângin zau zâwka rilru pawh inhawn a ṭûl thu a sawi a ni. Ramin hma a sâwn chho zêlin, hmasâwnna hna ngawrh taka thawh mêk zêl a nih laiin mi thiam, thiam bîk nei thawk tûr a lian aṭanga a tê ber ramin a mamawh thu te, chu'ng hmasâwnna hna hrang hrang thawk thei tûra mahni theihna, capacity insiama kan inzirtîr a pawimawh hle thu a sawi a. Ṭhalaite ṭangkaina tûr a nih phawt chuan sawrkâr pawhin Commission-ah sum an mamawh ang chu dah zêl tum a nih thu a sawi bawk.
MYC Chairman Pu _ chuan ṭhalaite ngaihsak an nih a, an hmakhua thlîr chunga Youth Summit & Road Show 2018 chu buatsaih a nih thu a sawi a. Ṭhalaite tân khawvêl thar siamnaah ṭhalaite khawvêl zauh a ngai tih hriain MYC chuan tûnah hian kawng hrang hrangin hma a la a ni tiin, MYC Chairman chuan chu'ng zîngah chuan Central IAS Online Coaching leh SSC Coaching siam a nih thu te, ṭhalaite tâna mi entawn tlâk leh entawn tûr thlan chhuah a, Young Achiever's Award buatsaih a nih tûr thu te, Incentive Cash Award atân chêng nuai 33 dah a nih thu te, Kohhrana ṭhalai pâwl hruaitute tân India rama Kohhran hmun pawimawh hrang hrang te tlawh theih nân Exposure Tour programme siam tum a nih thu te, Mizoram mawina leh hlutna khawvêl hmuha pho chhuah a, tourism tihmasâwntu a lo nih theih nân photographer-te nên ṭang kawpa hmâ lâk tum a nih thu te a sawi. Tûn hnaia Indian Air Force GARUD Commando lâknaah dîltu mi 3000 chuang zîngah MYC chuan dîl ve tûrin Gauhati-ah Mizo ṭhalai 19 tîr liam vein, mi 85 an lâk zîngah Mizo ṭhalai 2 an tel thu te, Medical Test la hmabâk an nih thu te leh, Indian Army-a Chaplain post ruak Mizoin an hnawh khah theih nân hmâ lâk tum mêk a nih thu te a târ lang bawk a. Pu _ chuan ṭhalaiten Youth Summit & Road Show 2018 chu an hman ṭangkai a, tumruhna nên hlawhtlinna an hmuh a duhsak thu a sawi a ni.
MYC Youth Summit & Road Show 2018 hi Skill Development leh Youth Affairs lama hmalâkna neiho Mizoram sawrkâr Department hrang hrang eng emaw zât bâkah Private Agency/Firm eng emaw zât nên thawk hoin Exhibition stall-te hawngin a ngaihventute tân counseling te neiin, ṭhenkhatin an thil siam chhuahte an hralh bawk a; Lungleiah hian Stall 51 hawn a ni.
Vawiina Lunglei Youth Summit & Road Show 2018 hawnna inkhâwm hi Lunglei D.C Dr Ankita Chakravarty chuan kaihruaiin, Lalngilneii Lianhlawng, University of Sussex, United Kingdom-a zir mêk chuan zirlai kal khâwmte fuihna leh ram pâwna zirna chhunzawm duhte tân hriat tûr ṭûl a sawi a; Pu Lalramthianghlima, DEO chuan lâwm thu sawiin hun a khâr a. Khual lian Chief Minister hi Pi Lal Riliani, President, Indian Society on Tobacco & Health, Mizoram Chapter chuan a ṭawiâwm bawk.
Youth Summit hi April 17 khân Aizawlah bul ṭan niin, April 24-ah Kolasib-a neih leh a ni a; April 27 khân Mamitah buatsain niin, May 4-ah Champhaiah, May 9-ah Serchhipah, May 15-ah Siahaa hman leh niin May 18 khân Lawngtlaiah hman leh a ni a. Lunglei hi a tâwpna tûr a ni.
