LARSAP HOVIN SPECIAL ECONOMIC ZONE TLAWH

Sri City SEZ, 6th March, 2024: Larsap Dr. Hari Babu Kambhampati leh Pu Malsawmzuala Ralte, chairman MYC te chuan vawiin khan Andhra Pradesh-a Sri City Special Economic zone an tlawh a, Sri City Managing director leh thawktu dang ten lo dawngsawngin, SEZ chhunga company hrang hrang heng - ISUZU, Colgate, Pepsico, Foxcon, Daikin, Havels, Kobelco etc. aiawhte nen thukhawmin, mizo thalaite tana hnathawh ve theih dan tur an sawiho.

Company hrang hrang 100 chuang awmah thawktu 60000 vel zet an awm a, hengah hian, security guard atanga ITI pass chhuak, diploma holder, class 10 atanga graduate chin leh engineer degree neite tan hnathawh tur remchang a awm thei tura ngaih a ni.

Human Resource department te nen ruahmanna siamin, anni lamin hnaruak, thiamna ngai chin leh hlawh tur zat an rawn ruahman fel ang a, chumi mil chuan MYC - in a thawk thei tur Mizo thalai a lo ngaihtuah dawn a ni.

Larsap ho hian special economic zone chhunga company thenkhat hnathawhna hmun fan kual a nih bakah IIIT tlawh a ni bawk. LESDE, Planning leh MISTIC department official te an tel bawk a ni.