MIZORAM YOUTH COMMISSION CHAIRMAN IN HNATHAWK TURTE A THLAH

Vawiin ni 8 November 2024 khan RK Enterprise, (Daikin AC Manufacturing) Sri City a hnathawk tur thalaite mi 10 Mizoram Youth Commission Chairman Pu Malsawmzuala Ralte in MYC Conference Hall, MINECO Khatla ah thingpui inpuiin fuihna hun a hmang.

            Heng thalaite hi Sri City hmunah hna an thawk dawn a. An hnathawhna tur hmun hi Mizoram Governor Dr. Hari Babu Khambampati leh MYC Chairman ten a hmuna an enfiah hmasak vek hnuah MYC leh RK Enterprise ten thawhhona thuthlung (MoU) siamin Mizo thalai te hi thawn thlak an ni ta a ni. Thalai 100 chuang mamawh an nih laiin tun tumah chuan a vawikhatna atan mi 10 te hi thawn thlak hmasak phawt an ni. He hunah hian damlohna avangin mi 3 erawh an tel thei lo a ni.

            Thalai hnathawk a kal turte chu MYC Chairman chuan Pathian tihna leh tumruhna, taihmakna nun pui tlat turin a fuih a. Chhel taka awm turin a chah bawk ani. An awmna hmun a an chetvelna leh awmdan apiang chu hnamdangte hmuhah chuan Mizo awmdan tih anih zel dawn avangin Mizo hnam aiawh an ni nghal bawk tih hria a, theihtawp a an nun uluk turin a fuih bawk. Tin, Tun a kal hmasate hi Mizo thalai kal ve duh midangte tana kawng sat tu an nih avangin midangte kawng sialsak tu ni turin a fuih bawk a ni.

            Heng Mizo thalai hnathawk tur te hian ni 11 November, 2024 (Thawhtanni) hian Aizawl chhuahsanin an hnathawhna tur an pan tawh dawn a. Hemi atan hian Guwahati thlengin MYC Official ten an thlah dawn a ni.