“MYC Online Coaching-a kalte zinga mi 200 hnenah Alternative Learning System (ALS)-in Scholarship a pe dawn.”
-_, Chairman, MYC
Date 2.6.2018 : Mizoram Youth Commission (MYC) leh IAS Coaching Institution tha Alternative Learning System (ALS), Delhi chuan Mizoram thalai mi 180 tana IAS Online Coaching leh HSSLC (Science) zirlai mi 400 tana IIT-JEE/NEET Online Coaching kalpuina tur inremna mumal tak an ziak fel. Pu _, Chairman, MYC leh Pu Prateek Bhattacharya, National Sales Head, ALS Satellite Education Pvt. Ltd., Delhi te’n ni 31.5.2018 khan MYC Office, Aizawlah he inremna hi hming an ziak hnan ve ve a; hei thil hi UPSC Civil Service Examination leh Engineer & Medical Entrance Test atana Mizoram ṭhalai leh zirlaite tan dam khawchhuahna tling tur a nih ngei Pu Mahima chuan a beisei thu sawiin, “MYC Online Coaching-a kalte zinga mi 200 hnenah Alternative Learning System (ALS)-in Scholarship a pe dawn,” a ti a ni.
Pu Prateek Bhattacharya, National Sales Head, ALS Satellite Education Pvt. Ltd., Delhi pawhin ALS leh MYC inremna thuthlung sawi fiahin, Mizoram Youth Commission chuan India rama IAS Coaching Institute lian ber nen inremna thuthlung a ziahpui a ni tih sawiin, ALS chuan India ram pumah IAS Rank No. 1 vawi 3 a lo hauh tawh thu te, kum 2017 IAS Exam result kumin 2018-a tihchhuahah IAS 244 an neih thu leh kum 5 chhung - kum 2013-2018 hian IAS 990 an hlawhtlinpui tih a sawi a. Pu Prateek chuan sawi belhin, “He kan inremna thuthlung hi ALS-in kan ngaih pawimawhzia lantirna bul ṭan nan Corporate Social Responsibility (CSR) atangin ALS chuan MYC Online Coaching zawmtute zinga mi 200 tan Scholarship Rs. 33.04 lakh kan phalsak nghal a; Civil Service hnaa luh tum IAS Coaching zawm tur Scholarship Examination-a Top 100 tan Rs. 24.78 lakh leh Engineer leh Doctor nih tum IIT-JEE/NEET Coaching-a kal turte Scholarship Examination-a Top 100 tan Rs. 8.26 kan sanction nghal a, hei hi sum faia zirlaiten an dawn tûr ni loin, coaching fee an chawi tûr phuhrûksakna tûr a ni,” a ti bawk.
He Scholarship dawng turte bakah hian MYC Online Coaching-ah hian IAS atan mi 80 leh IIT-JEE/NEET-ah zirlai 300 tan MYC chuan fee concession a siamsak dawn bakah, Scholarship hmu phaho tan pawh an scholarship hmuh theih zat milin tanpuina leh lawmpuina ruahmansak an ni dawn a; tin, MYC hnuaia IAS Online Coaching hi Northern Mizoram Zone Centre, Aizawlah leh Southern Mizoram Zone Centre, Lungleiah hawn tur a ni a, IIT-JEE/NEET Coaching pawh School Education Department hotuten Higher Secondary School-a Coaching Centre an ruahmansak theihna hmuna kalpui tum a nih thu MYC Chairman Pu Mahima chuan a sawi bawk.
MYC Online Coaching kalpuina tur satellite khawl VSAT (Very Small Aperture Terminal) pawh MYC mamawh tur ang ALS-in an rawn bunsak nghal dawn thu te, VSAT khawl pakhatin Classroom pahnih zel chawm thei tur MYC-in an chah tih Pu Mahima chuan a sawi a; a bul ṭan nan VSAT khawl paruk (6) an inbun phawt tur thu sawiin, July 2018 thla tir lama Online Coaching Class hawng tura chak taka an inbuatsaih thu te, Scholarship Examination pawh buatsaih thuai turin Delhi atanga ALS Team an chah nghal tur thu a sawi a. Pu Mahima chuan, “Mizoram ṭhalai leh zirlaite chu hemi atana lo inbuatsaih nghal tur hian ka chah a; Tribal quota nen lo pawha IAS tlin theihna tur te, Mizoram quota piah lama Engineering/Medical College tha chang pha tur leh IIT Institution tha ber berah pawh lut thei turin coaching mumal leh tha tak sawrkarin a chhawp chhuah tur hi tih tak takna nen Mizoram ṭhalai leh zirlaiten rawn luh chilh rawh u khai,” a ti a; “Ṭhalaite khawvel zauh ang aw,” tiin, ṭhalai leh zirlaite tana chona thar duhawm tak a siam a ni.
