West Impress- State level Workshop- Innovative Education Aligning Mizoram Curriculum with Future Career Opportunities
Aizawl, the 14th October, 2024: Vawiin dar 1:00 pm khan MYC Chairman-in West Impress- State level Workshop- Innovative Education Aligning Mizoram Curriculum with Future Career Opportunities tih Government Aizawl West College buatsaih chu a auditorium GAWC-ah a hman pui.
Zirtirtu, zirlai leh mithiam lo kal te hnenah Pu Malsawmzuala Ralte, MYC Chairman chuan University syllabus chu NEP hnuaia duan vek a nih avangin kut them thiam, eizawnna tan a tangkai tur pawh syllabus-ah hian zeh tel a nih thu a sawi a. Kan zir chhuah dan Curriculum ber chu a pawimawh tih sawiin mitdel hlavawn (Rot Learning) kal san a kan zirlai kan hriat chian a pawimawh a. Chu chuan eizawnna tak tak hna kan dapna-ah min pui thei dawnin a sawi a ni. MYC hmalakna hrang hrang a sawi chhun zawm a. MYC chuan Honda India Foundation leh Visan Foundation te tangkawpin Project Buniyaad Hospitality Management Training Course neih mek a ni a. Heta training chhuak te hi India ram Hotel lianah te an thawk nghal dawn a ni. Heng bakah hian Tirupati lama thawk turin Mizo thalai za rual te tirh chhuah an ni dawn a, advertisement te ti chhuak tawhin hei hi hmalak mek zel a ni bawk. Heng bakah hian health sector lamah mai ni lo hna dang tam tak thawhna Japan lama in hawn tak avangin NSDC nen thawhho na tur sawi tawh chu a hmun en thli thali turin chairman pawh a kal thuai tur thu a sawi a. Mizoram chhungah pawh coaching centre- Aizawl, Lunglei, Saiha, Serchhip-ah te neih mek a ni a. Kolasib lam pawh hawn leh thuai tum a ni. Hengah hian Group A leh B coaching te neih mek a ni a. Mi 500 chuang he coachingah hian an kal mek a ni. Mission UPSC (Taitesena) pawh chak taka hmalak zel a ni a, rah tha a chhuah vat beisei a ni. Heng bakah hian Mission SSC leh Banking hi Mizo thalaite tan nasa taka hmalak lehna tur a ni a. Delhi lama mithiam bik te nen in dawr mek a ni bawk. Mandarin tawng zirturin Mizo thalai pahnih tirh mek an ni a. Hemi te hian an lo haw hunah Taiwan-a Mizo hnthawk duh te tawng an zirtir thung ang. Tawng a pawimawh avangin Centre of Excellence for Language Learning- tawng zirna hmunpui din tur a hma an lak mek thu a sawi bawk.
Hengah te hian tawng thiam leh life skills a pawimawh zia a sawi zui a. Mizo thalaite tluk a thil thiam hma thei hi an awm bik lo a. Kan state tan pawh human resource kan neih hi kan rohlu ni a sawiin, India ram hmun hrang hrang bakah khawchhak lam Japan, Korea, China ram te kan thalai te’n an dai dar dawn a ti a. Chutiang tur chuan chak takin MYC hian hma a la mek a ni a ti.
He programme-ah hian Prof. Lalbiakdiki Hnamte, Working chairman Mizoram Education Reforms Committee mai bakah Dr. B. Lalzarliana, MZU, Alan Lalhriatpuia, CEO Leilen Pvt.Ltd ten sawihona an nei a. Dr Janet Vanlalhlimpuiin kaihruaiin keynote address Dr. Lalremruati te’n an sawi bawk. West Impress programme hi Social issues, Political issues leh Policy te a mithiam te sawihona a ni a. Remchang a piangin College hian a huaihawt thin.
