Sri City SEZ, 6th March, 2024: Larsap Dr. Hari Babu Kambhampati leh Pu Malsawmzuala Ralte, chairman MYC te chuan vawiin khan Andhra Pradesh-a Sri City Special Economic zone an tlawh a, Sri City Managing director leh thawktu dang ten lo dawngsawngin, SEZ chhunga company hrang hrang heng - ISUZU, Colgate, Pepsico, Foxcon, Daikin, Havels, Kobelco etc. aiawhte nen thukhawmin, mizo thalaite tana hnathawh ve theih dan tur an sawiho.

Aizawl, 1st March, 2024 : Taiwan ambassador to India Baushuan Ger, Chapchar kut hmanga lo kal chuan vawiin khan MYC office a tlawh. MYC chairman Pu Malsawmzuala Ralte, Pu H. Lalnunzuala, Under Secretary leh thawktu dang ten lo dawngsawngin, Taiwan leh India sorkarin labour mobility-a inremna thuthlung an ziah hrul a mizo thalai ten Taiwan a hna an thawh theih dan tur an sawiho.

Aizawl, 29th February, 2024 : Govt. T. Romana College leh MYC tangdunin an buatsaih North-East Cultural Festival & Pre-Chapchar Kut chu vawiiin khan Govt T Romana College ground-ah hman a ni. Festival hi St. Anthony’s College, Shillong leh Janata College, Assam atanga zirlai leh zirtirtu engemawzat lo kalin an hmanpui a. Aizawl chhunga College ten an hmanpui bawka. Pu Malsawmzuala Ralte, Chairman, MYC chuan khuallian niin he hun hi a hmanpui bawk.

New Delhi, 24th February, 2024 : MYC chairman Pu Malsawmzuala Ralte chuan nimin tlai khan MYC in a enkawl UPSC exam tura delhi-a inbuatsaiha awm mek, mizo thalai 10-te chu kawmin Delhi Mizoram House-ah zanriah a ei pui. MYC chairman-in a sawm angin Vision IAS coaching centre a zirtirtu Satender-a'n prelims exam tura inbuatsaih dan leh hmachhawn dan tur kawng kawhhmuhin thu a sawi.

Noida, 23rd February, 2024 : Vawiin khan MYC Chairman Pu Malsawmzuala Ralte chuan HCL Foundation office Noida-a tlawh a, General manager Robin Thomas leh manager Anjul Srivasta te nen inkawmin, Mizo thalai te tana hmalak theih dan tur an sawiho. HCL foundation hotute chuan MYC in hmun hla tak atanga an rawn pan avanga lawmthu sawiin, an programme pakhat Sports for change hnuaia MYC nen an thawhho theih thu an hrilh. Mizo thalai leh naupang harsa zawk te tan Sport discipline hrang hrangah mumal takin training an pe thei a, sport a mizo naupangte theihna tam tak haichhuah kawnga hma la ho turin ruahmanna an siam nghal a, remchang hmasa berah HCL Foundation hian Aizawl a an lo zin tur thu an lo hrilh bawk.

New Delhi, 23rd February, 2024 : Vawiin khan Pu Malsawmzuala Ralte, chairman MYC leh Pu Jonathan Lalremruata, OSD to CM te National Skill Development Corporation office-ah lengin Ved Mani Tiwari, CEO leh Mayank Bhatnagar, National Head State Engagement te nen an inkawm a, mizo thalaite tana skill development training buatsaih dan tur sawi hovin, hmalak ho ni se an ti a. Okhla Industrial Estate a mizo thalai skill training tura thawn theih dan turte pawh ruahmanna siam ni se an ti bawk.

New Delhi, 21st February, 2024 : Vawiin khan Pu Malsawmzuala Ralte, chairman MYC leh Pu Jonathan Lalremruata, OSD to CM ten Rajeev Chandrasekhar, sawrkar laipuia Minister of State for Skill Development chu a chenna in, Delhi-ah kawmin MYC in Mizo thalaite tana skill development training a buatsaih theihna tura hmalak pui turin an ngen. Pu Rajeev Chandrasekhar chuan MYC chairman leh OSD to CM te hi tha taka lo dawngsawngin, thalai a tam thei ang ber skill training pek a duh tih a sawi bakah, MYC atangin lehkha siam a, a hnena thehlut turin a ti a, lehkha a hmuh atanga darkar 48 chhungin a team ten Aizawl an thlen nghal tur thu sawiin, anni nena sawi ho hnuah final mai tur a nih thu a sawi bawk.

New Delhi, 19th February, 2024 : Pu Malsawmzuala Ralte, chairman, Mizoram Youth Commission leh Pu Jonathan Lalremruata, OSD to CM te chuan John Barla, Union Minister of State for Minority Affairs chu a chenna in, Delhi-ah vawiin khan an kawm. Pu Malsawmzuala Ralte chuan, mizo thalaite tana MYC hmalakna hrang hrang hrilhin, minister chu a theih anga a portfolio atanga tanpuina dap pui turin a ngen a. Minister pawhin hriatthiampuiin, a Secretary, Mithunyadav nena hmalak theihna sawiho tura a rawn angin, an sawiho nghal a.

Aizawl, 17th February, 2024 : Mizoram Youth Commission chairman Pu Malsawmzuala Ralte chuan nizan khan Chanmari YMA Hall-ah, "Mahindra XUV 300 LPS Cup 2024 inter village football" tournament a kick-off. He hunah hian Pu Malsawmzuala Ralte chuan thu sawina hun hmangin Tournament lian, ram pum huapa buatsaih chu player tha, thiamna nei la inthup a, la lar lote inpho lanna hun remchang a ni thin a ti a Tun hmain mizo footballer tha tak tak, discipline that loh avanga an nih tur ang ni pha ta lo an awm fo thin tih sawiin, ruihtheih thil leh insum theih lohna avanga thleng sang ta lo pawh an tam, a ti.

Van Vigyan Kendra/VVK hnuaia ni 3 awh tur pa khawi training hawnna vawiin khan ICFRE-BRC Conference hall, Bethlehem vengthlangah tan a ni a, MYC chairman Pu Malsawmzuala Ralte chu khuallian niin a hawnna a hmanpui. MYC chairman chuan, pa khawi training tura armed veng south leh bethlehem vengthlang atanga lo kal khawmte chu, sum lakluhna hnara hmang thei tura training chhuak ngei tura chahin, taimakna, thawhrimna leh tei rei peihna nen, an hlawhtlin hma chu engmah an kawng daltu awm phal lo turin a fuih bawk.

Mizoram Youth Commission, Mission Foundation Movement leh Population Services International, Delhi a mi te chuan thawh hona thuthlung an sign. An thawh hona tur huang chhungah hian, drugs hman sual, skill development, livelihood & entrepreneurship development, HIV, hriselna lam kaihhnawihah a ni ang. Thalai abikin home-a awm mekte tan, an tui zawng leh thiam zawng lama thawh tur an neih theihna turin skill development leh entrepreneurship training buatsaih sak a, home an chhuahsan hnuah pawh thawh tur an neih ngei theihna tura hmalak pui an tum dawn a ni.

Aizawl, 7th February, 2024 : Mizoram Larsap Dr Hari Babu Kambhampati-a'n a sawm angin Mizoram Youth Commission chairman Pu Malsawmzuala Ralte chu Raj Bhavan-ah vawiin chawhma dar 11:00 khan lengin an inkawm. Pu Malsawmzuala Ralte chuan MYC hmalak dan tlangpui leh an hmachhawp bakah, mizo thalaiten hna zawn leh mahni kea an din theihna tura an ruahmanna neih te a hrilh a.