Date 25.4.2018: Vawiin khan Jet Airways hotute chuan Mizoram Youth Commission Chairman, Pu _ chu a chenna inah an kâwm a. Pu _ chuan Mizo ṭhalai eng emaw zat Jet Airways-a an thawk chu ṭha a tih thu a sawi a. Jet Airways Cabin Crew leh Ground Staff Mizo ṭhalaite tan Mizo Traditional Dress-a inthuam ni bik awm turin a duh thu leh, Mizo thuam mawi tak hmanga ṭhalaite an inthuam theih chuan Jet Airways pawhin a mawi phah ngei a rin thu a sawi a. Jet Airways-in Aizawlah Cabin Crew mai bakah Ground Staff tura hna lak tam zawk nei tura a duh thu sawiin, kumin September hian Jet Airways hnuaia thawk tur lakna Recruitment Drive nei leh turin a sawm bawk a. Jet Airways hotute pawhin MYC Chairman ngaih pawimawhte chu bawh zui an tum thu leh Jet Airways Recruitment pawh buatsaih leh ngei an tum thu an sawi a ni.

Nimin khan Mizoram Youth Commission Office, New Secretariat Complexah Jet Airways Cabin Crew Recruitment neih a ni a; Mizoram ṭhalai mi 232 zet an interview a, hengho aṭang hian mi 29 shortlist an nih hnuin interview second round-ah (height & weight) mi 19 an tling a. Hemi hnu hian Group Discussion round-ah mi 12 an tling leh a, a la tling zawng hian vawiin khan interview fourth round hmachhawn lehin, heng mi 12 hian interview final round hmachhawn turin an tling leh vek a, April 28, 2018-ah interview final round hi Mizoram Youth Commission Office-ah neih a ni dawn a ni. Jet Airways Cabin Crew Recruitment buaipuia Jet Airways Team Aizawl-a lo kalte hi Mumbai aṭangin Human Resource Director, Pu Feroz Khan chuan a rawn ho a ni.